UEFA milli komandaların oyunlarına marağın artırılması məqsədilə yeni turnir keçirmək niyyətindədir. Apasport.az saytının məlumatına görə, artıq layihəsi hazırlanan yarış Millətlər Liqası adlanacaq.


Avropanın yığmaları FİFA reytinqinə əsasən 5 qrupa - diviziona bölünəcək. Bu layihə 2016-cı ildən tez həyata keçirilməyəcək.

Millətlər Liqasında mübarizə milli çempionatlardakını xatırladacaq. Hər divizionda sonuncu olan aşağı dəstəyə yuvarlanacaq, ən yaxşısı isə daha yüksəyinə keçəcək.

FİFA-nın son reytinqinə əsasən, Azərbaycan millisi gücünə görə 4-cü olan D divizionunda yer alacaq. Təbii ki, 2016-cı ilədək bu qrupların sayı, onların hərəsində neçə komandanın olması və tərkibi dəyişəcək. Amma indiki variantda A və B divizionlarında 8, C və D divizionlarında 16 komanda yarışması nəzərdə tutulub. Ən zəif 6 komanda isə sonuncu dəstədə qərarlaşıb.

A qrupu: İspaniya, Almaniya, İtaliya, Belçika, Hollandiya, Xorvatiya, Portuqaliya, Yunanıstan

B qrupu: İsveçrə, Rusiya, İngiltərə, Bosniya və Hersoqovina, İsveç, Danimarka, Fransa, Ukrayna

C qrupu: Monteneqro, Sloveniya, Macarıstan, Rumıniya, Çexiya, Norveç, Serbiya, Albaniya, Avstriya, Türkiyə, Uels, İslandiya, Ermənistan, Finlandiya, İrlandiya, Slovakiya

D qrupu: Şotlandiya, Bolqarıstan, Polşa, İsrail, Makedoniya, Belarus, Şimali İrlandiya, Estoniya, Gürcüstan, Azərbaycan, Litva, Latviya, Lüksemburq, Moldova, Qazaxıstan, Kipr

E qrupu: Malta, Lixtenşteyn, Farer adaları, Andorra, San Marino, Cəbəllütariq.