Şrift:
MTN iş başında
28.03.2012 [12:00] - Xəbərlər
Eldar Mahmudov: Azərbaycanın maraqlarına qarşı yönələn təhdidlərlə mübarizədə önəmli nəticələr əldə edilib
Son bir il ərzində Azərbaycanın siyasi, hərbi və iqtisadi maraqlarına qarşı yönələn təhdidlərə, terror-təxribat və kəşfiyyat-pozuculuq niyyətlərinə qarşı məqsədyönlü mübarizədə önəmli nəticələr əldə edilmişdir. Bunu milli təhlükəsizlik naziri, general-leytenant Eldar Mahmudov rəsmi dövlət qəzeti olan "Azərbaycan" qəzetində dərc olunmuş yazısında bildirmişdir.
Nazir bildirib ki, Azərbaycan, o cümlədən onun Silahlı Qüvvələri əleyhinə xarici xüsusi xidmət orqanlarının kəşfiyyat və digər pozuculuq fəaliyyətinə qarşı bir sıra effektli preventiv əks-kəşfiyyat tədbirləri keçirilmişdir.
Xarici xüsusi xidmət orqanlarının tapşırığı ilə Azərbaycan ərazisində kəşfiyyat-agentura fəaliyyəti ilə məşğul olan 2 nəfər hərbi qulluqçu barəsində Cinayət Məcəlləsinin "Dövlətə xəyanət" maddəsi ilə cinayət işləri başlanmışdır.
Nazirin sözlərinə görə, Milli Təhlükəsizlik Nazirliyinin həyata keçirdiyi səmərəli əks-kəşfiyyat tədbirləri nəticəsində, Azərbaycanın suverenliyi və dövlət təhlükəsizliyi zərərinə olaraq casusluq etməklə dövlətə xəyanət, habelə terror aktına hazırlıq görən, külli miqdarda qanunsuz odlu silah, döyüş sursatı əldə etmiş və digər təhlükəli cinayətdə təqsirli bilinən, İran xüsusi xidmət orqanları tərəfindən əməkdaşlığa cəlb edilmiş 2 ayrı-ayrı qrup, bütövlükdə 24 nəfər ifşa olunaraq tutulmuşlar.
Mahmudov qeyd edib ki, terrorçuluqla mübarizə istiqamətində həyata keçirilmiş kompleks tədbirlər nəticəsində Pakistan-Əfqanıstan ərazilərində koalisiya qüvvələrinə qarşı silahlı birləşmələrdə iştirak etmiş və beynəlxalq axtarışda olan 2 nəfər tutulmuşdur.
Nazir bildirib ki, mütəşəkkil transmilli cinayətkarlıq bütün dünya ölkələri, o cümlədən əlverişli geostrateji mövqeyə malik, dinamik inkişaf edən Azərbaycan üçün narahatlıq doğurur.
"Bu məqsədlə ötən il Milli Təhlükəsizlik Nazirliyi tərəfindən narkotik vasitələrin qaçaqmalçılığı, qeyri-leqal miqrasiya, insan ticarəti, "çirkli pulların yuyulması", kibercinayətlər və mütəşəkkil cinayətkarlıqla bağlı digər sahələrdə mübarizə ardıcıl davam etdirilmişdir", - Mahmudov deyib.
Onun sözlərinə görə, ötən müddətdə narkotik vasitələrin, psixotrop maddələrin və onların prekursorlarının qanunsuz dövriyyəsi ilə məşğul olan 30-a yaxın transmilli mütəşəkkil cinayətkar dəstə və qrup ifşa olunmuş, ümumilikdə 630 kiloqrama yaxın narkotik vasitə qanunsuz dövriyyədən çıxarılmışdır.
Həmin narkotik vasitələrdən 353 kiloqramı Rusiya, Ukrayna və Tükiyədən olan tərəfdaşlarla birgə keçirilmiş əməliyyat tədbirləri nəticəsində müsadirə olunmuşdur.
Faktlarla bağlı 40 cinayət işi başlanmış, Azərbaycan, Ukrayna, Rusiya, İran və Gürcüstan vətəndaşlarından ibarət 137 nəfər istintaqa cəlb olunmuşdur.
Mahmudov bildirib ki, qaçaqmalçılıqla mübarizə tədbirləri çərçivəsində təyinatına görə nüvə sənayesində istifadə edilən avadanlığın qaçaqmalçılığı ilə məşğul olan transmilli mütəşəkkil cinayətkar dəstə də zərərsizləşdirilmişdir.
Eləcə də dərman və dərman preparatlarının, külli miqdarda qiymətli daş-qaşın və qızıl məmulatlarının, spirtli içkilərin, radioaktiv və zəhərləyici maddələrin qaçaqmalçılığının qarşısı alınmış, ümumilikdə bu faktlar üzrə 8 cinayət işi başlanmış, 16 nəfər məsuliyyətə cəlb olunmuşdur.
O deyib ki, insan alverinə qarşı mübarizə sahəsində Azərbaycan vətəndaşları olan qadınların cinsi istismar məqsədilə xarici ölkələrə göndərilməsinin qarşısı alınmış, faktla bağlı cinayət işi başlanmışdır. Milli Təhlükəsizlik Nazirliyinin materialları əsasında Baş Prokurorluq tərəfindən "İnsan orqanlarının alqı-satqısı və onların transplantasiya məqsədi ilə götürülməsinə məcbur etmə" maddəsi ilə başlanmış cinayət işi üzrə 2 nəfər Azərbaycan vətəndaşı məsuliyyətə cəlb olunmuşdur.
Həmçinin 2011-ci il ərzində Gədəbəy Qızıl-mis Emalı Zavodundan xam qızılın oğurlanması ilə məşğul olan Azərbaycan vətəndaşlarından ibarət mütəşəkkil cinayətkar dəstə ifşa olunaraq cinayət məsuliyyətinə cəlb edilmişdir.
Həyata keçirilmiş əməliyyat tədbirləri nəticəsində kompyuter informasiyasına qanunsuz daxil olaraq müxtəlif bank hesablarından külli miqdarda pul vəsaitlərinin talanmasında təqsirli bilinən mütəşəkkil dəstə yaxalanmışdır.
Bundan başqa, saxta sənədlər, o cümlədən saxta qiymətli kağızlar hazırlama, nəzarətdənkənar beynəlxalq rabitə xidmətinin təşkili, külli miqdarda vergi ödənişlərindən yayınma, insanların etibarını qazanmaqla külli miqdarda pul vəsaitini mənimsəmə və digər cinayətlər üzrə 27 cinayət işi başlanmışdır.
Bu xəbər oxucular tərəfindən 861 dəfə izlənilmişdir!
Google Yahoo Facebook Twitter
Del.icio.us Digg StumbleUpon FriendFeed