Şrift:
TEAS Press Azərbaycan Cümhuriyyəti tarixinə dair daha bir kitab nəşr edib
06.04.2017 [10:44] - Gündəm
Azərbaycanın mühacirət tarixinin tədqiqatçısı Dilqəm Əhmədin "Mühacirlərin dönüşü" adlı kitabı bu günlərdə TEAS Press Nəşriyyat evi tərəfindən nəfis tərtibatla çapdan buraxılıb. Avropa Azərbaycan Cəmiyyətindən bildirilib ki, kitabda Azərbaycanın mühacirət tarixi ilə bağlı yeni sənədlər, məktublar, fotoşəkillər yer alır, mühacirlərin həyatından maraqlı fraqmentlər, yeni məlumatlar verilir.

Məhəmmədəmin Rəsulzadə, Mirzəbala Məhəmmədzadə, Abbasqulu Kazımzadə, Əbdülvahab Yurdsevər, Məhəmmədəli Rəsulzadə, Almas İldırım, Mustafa Vəkiloğlu, Əziz Alpoud, Səməd Ağaoğlu kimi görkəmli şəxsiyyətlərə aid materiallar müəllifin yeni araşdırmaları nəticəsində əldə edilib və oxuculara ilk dəfə təqdim olunur.

Kitabda 1918-ci ildə Məhəmmədəmin Rəsulzadənin rəhbərliyi ilə İstanbula göndərilən Azərbaycan nümayəndə heyətinə aid nadir foto da öz əksini tapıb. Müəllif bu fotonu İstanbulda bir kitabçıdan satın alıb.

Dilqəm Əhmədin verdiyi məlumata görə, ötən il mühacirət arxivlərinin alınması üçün elan edilən kampaniya nəticəsində, həmvətənlərimizin dəstəyi ilə həmin arxivlərin bir qismini almaq mümkün olub: "Həmin sənədlər əsasında bu kitabı ərsəyə gətirdik. Kitabda onlarla məktub, foto var ki, ictimaiyyətə ilk dəfə təqdim edilir. Əsəri öz hesabına, təmənnasız çap etdiyinə görə TEAS Press Nəşriyyat evinə dərin minnətdarlığımı bildirirəm. Kitabın ikinci cildi üçün yeni kampaniyaya başlamışıq. Kampaniyamıza dəstək olarsa, cümhuriyyətimizin 100-cü ildönümünə yeni kitab həsr edəcəyik".

Qeyd edək ki, bu, TEAS Press Nəşriyyat evinin həmin mövzuda çap etdiyi ilk kitab deyil. Bundan əvvəl də nəşriyyat bu mövzuya müraciət edərək, Ədalət Tahirzadə və Oğuztoğrul Tahirlinin "Azərbaycan Cümhuriyyəti tələbələri. Tarixi arayış. Bəlgələr. Yaşamlar", Giorgi Mamulia və Ramiz Abutalıbovun "Odlar yurdu azadlıq və müstəqillik uğrunda mübarizədə. Azərbaycan mühacirətinin siyasi tarixi, 1920-1945", Xaləddin İbrahimlinin "Azərbaycan mühacirəti tarixi", Dilqəm Əhmədin "Fərqlilər. Yeni fotolar, yeni sənədlər" kitablarını çap edib.

"Mühacirlərin dönüşü" kitabının elmi redaktoru professor Ədalət Tahirzadə, nəşriyyat redaktoru Kərim Kərimlidir.
Bu xəbər oxucular tərəfindən 847 dəfə izlənilmişdir!
Google Yahoo Facebook Twitter
Del.icio.us Digg StumbleUpon FriendFeed