Qadın voleybolçular arasında 2018-ci il dünya çempionatının seçmə mərhələsinin Bakıda təşkil olunan E qrupunda bu gün IV turun oyunları keçirilib. Azərbaycan milli komandası İsrail yığması ilə üz-üzə gəlib.
Bakı İdman Sarayında keçirilmiş görüş meydan sahiblərinin asan qələbəsi ilə yekunlaşıb - 3:0. Beləliklə, ardıcıl 4-cü oyunundan qalib ayrılan Azərbaycan millisi liderliyini qoruyub.
Turun daha bir önəmli qarşılaşmasında Hollandiya Ukraynanı çətinliklə yenib. Ciddi müqavimətlə üzləşən "narıncılar" oyunun "tay-breyk"ə uzanmasına imkan verməyiblər - 3:1.
Autsayderlərin qarşılaşmasında isə Norveç Danimarkanı eyni hesabla yenərək, ilk qələbəsini əldə edib.
Bu nəticələrdən sonra Azərbaycan və Hollandiya hərəyə 12 xalla 1-2-ci yerləri bölüşürlər. 6 xalı olan Ukrayna 3-cü pillədə qərarlaşıb. 3 xala malik İsraillə Norveç 3-4-cü yerləri bölüşür. Xalsız Danimarka isə sonuncudur.
Beləliklə, son turda dünya çempionatına yeganə vəsiqənin taleyi Azərbaycan - Hollandiya matçında həll olunacaq. Qalib komanda Yaponiyada keçiriləcək mundiala yollanacaq. Məğlub tərəf isə "pley-off"da çıxış edəcək. İyunun 3-də Norveç - İsrail və Ukrayna - Danimarka matçları da keçiriləcək.
Dünya çempionatının seçmə mərhələsi
E qrupu
IV tur
15:00. Danimarka - Norveç - 1:3 (25:21, 15:25, 23:25, 15:25)
Hakimlər: Roberto Boris (İtaliya), Mixail Temelis (Yunanıstan)
17:30. İsrail - Azərbaycan - 0:3 (9:25. 14:25, 18:25)
Hakimlər: Sanya Mikloşiç (Sloveniya), Sabine Vitte (Almaniya)
20:00. Hollandiya - Ukrayna - 3:1 (30:28, 18:25, 25:13, 27:25)
Hakimlər: Saşa Stanisiç (İsveçrə), Bruno Muxa (Xorvatiya).