Şrift:
Fars dilini öyən “Qanun” qəzeti İranda qeyri-fars millətləri ilə yanaşı Türkiyə və Azərbaycanı da hədəfə alıb
12.06.2018 [11:00] - Güney Azərbaycan xəbərləri, Güney Azərbaycan-Təbriz
Fars dilinə ifrat dərəcədə övgülər yağdıran irqçi “Qanun” qəzeti tarixi həqiqəti təhrif edərək İranda qeyri-fars millətlərinin dil və mədəniyyətini əhəmiyyətsiz qələmə verib, çoxlarının qısır dil kimi xarakterizə etdiyi fars dilini İranda bütün dillərin anası adlandırıb.



Qəzetdə dərc olunan “Fars dili iranlıların müştərək irsi” başlıqlı yazıda qeyri-fars millətlərinin kimliyi İran kimliyinin tərkib hissəsi kimi təqdim olunub və iddia edilib ki, “fars dilini bir qövm dili həddinə tənəzzül etdirmək düzgün deyil, ona görə ki, bu dil İrandakı mövcud dillərin anası sayılır.” Halbuki, bir çox mütəxəssis fars dilinin qısır bir dil olduğunu iddia edərək bu dilin elmi olmadığını, onun teknologiya haqda məlumatları dəqiq çatdırmaqda aciz olduğunu bildirir.



Yazıda Türkiyə və Azərbaycan Respublikası mədəniyyət oğruları kimi təqdim olunub və iddia edilib ki, Türkiyə və Azərbaycanın mədəniyyət oğrusuna çevrilməsinə səbəb onların qalıcı mədəni irslərə malik olmamasıdır. Azərbaycan və türk tarixini dəfələrlə təhrif edən qəzet Azərbaycan Respublikasını tarixi irsdən məhrum olduğu üçün tarixi təhrif edərək öz kimliyini saxtalaşdırmaqda günahlandırıb.



Qəzetin adsız yazıçısı ötən günlərdə qeyri-fars dilləri küçə söyüşləri ilə təhqir edən sözdə şair və universitet müəllimi Şəfii Kədkəninin mövqeyini müdafiə edərək fars dilini bütün iranlıların müştərək tarixi irsi adlandırıb.



Müəllif çoxlarının qısır və zəif dil adlandırdığı fars dilini olduqca güclü bir dil kimi təqdim edib, İrandakı digər dillərin şərq və qərbin tarixi dilləri qarşısında zəif olduğunu iddia edib.

“İranın müxtəlif bölgələrində yaşayan əhalinin belə bir dili olduğu halda, onların əvəzedici dil kimi heç bir dilə ehtiyacı yoxdur. Lakin İran neçə dilli olsaydı və yerli dillər hər məntəqə üçün meyar dil kimi rəsmiləşsəydi, o zaman əhali yerli dilin zəif olduğundan xarici dillərə tərəf yönələcəkdi”- deyə müəllif iddia edib.



“Qanun” qəzeti öz dil və mədəniyyətlərini müdafiə edən qeyri-fars bölgələrinin millət vəkillərini də hədəfə alaraq onları mədəniyyət və kimlik dəllalları adlandırıb. İrqçi müəllifin fikrinə görə, millət vəkilləri parlamentə girmək üçün əhalidən bir neçə səs toplamaq məqsədi ilə bütün iranlıların kimliyini ayaqlar altına alır, həqiqəti əks etdirməyən fikirlər irəli sürürlər.



Yazının müəllifi millət vəkillərini təhdid etməkdən də çəkinməyib: “Millət vəkillərinin bu hərəkəti onlara baha başa gələcək. Onlar bu işləri ilə xarici dövlətlərin oyunlarının qurbanı olur və təsəvvür edirlər ki, təmsil etdikləri bölgənin əhalisi də onlarla eyni fikirdədir. Lakin İran əhalisi hər zaman onları bədnam bir insan kimi xatırlayacaq.”



Burada qeyd etmək lazımdır ki, millət vəkilləri nə qədər milli kimliklərini və ana dillərini müdafiə edirlərsə, o qədər də yerli əhali tərəfindən dəstəklənirlər.



Böyük ehtimalla İslam İnqilabı Keşikçilər Korpusu (“Sepah”) və Ettelaat İdarəsinin əlaltısı olan adsız yazıçı yəqin ki, ana dilinin məktəb və universitetlərdə tədris olunmasını tələb edən millət vəkillərini nəzərdə tutur.



Antitürk və antiazərbaycan mövqeyi ilə seçilən irqçi “Qanun” qəzeti vaxtaşırı Azərbaycan türk millətinin milli kimliyi və ana dili haqda qərəzli yazılar dərc edir. Bu kimi hərəkətlər şübhəsiz ki, İranın parçalanması ideyasını daha da gücləndirir, artıq bir çox ekspert İranın gələcəkdə bir neçə yerə parçalanacağını proqnozlaşdırır.
Bu xəbər oxucular tərəfindən 78 dəfə izlənilmişdir!
Google Yahoo Facebook Twitter
Del.icio.us Digg StumbleUpon FriendFeed