Şrift:
Bakı Metropoliteni “Metro” Beynəlxalq Assosiasiyasının müşavirəsində iştirak edib
06.11.2018 [10:09] - Gündəm, İqtisadiyyat
MDB məkanı ölkələrinin “Metro” Beynəlxalq Assosiasiyasına üzv metropolitenlər və müəssisələrin baş mühəndislərinin texniki şurasının yığıncağı bu dəfə Rusiyanın Sankt-Peterburq şəhərində keçirilib. “ES-Servis” QSC və Peterburq metropoliteninin bazasında təşkil olunan müşavirədə “Bakı Metropoliteni” QSC-ni istismar üzrə baş mühəndisi Əlixan Osmanov təmsil edib.

“Bakı Metropoliteni” QSC-nin mətbuat xidmətindən bildirilib ki, tədbirdə müasir metro vaqonları və eskalator kompleksləri əsas müzakirə mövzusu olub. Bu xüsusda vaqonlara dair müzakirələrdə asinxron mühərriklərini qidalandıran təmas relsi cərəyanının minimuma endirilməsinə geniş diqqət ayrılıb. Eskalatorların hazırlanması və istehsalı, elektrik mühərriklərinin yeni layihələri, təhlükəsizlik qaydaları, həmçinin digər norma və qaydalara edilən dəyişikliklər də müzakirə olunub.

Müşavirə iştirakçıları “ES-Servis” QSC-nin, “Çerqos” ASC-nin istehsalat sahələri, Peterburq metropoliteninin yeni stansiyaları və innovativ avadanlıqlarla tanış olublar.

Əlixan Osmanov qeyd edir ki, müşavirə iştirakçılarının səfər etdikləri Peterburq metrosunun bu il istifadəyə verilmiş 5 yeni stansiyası (“Şuşarı”, “Novokrestovskaya”, “Beqovaya”, “Dunayski prospekt” və “Prospekt Slavı”) texnoloji innovasiyaların tətbiqi baxımından Bakı metropoliteninin Bənövşəyi xəttinin 2 stansiyası ilə eynilik təşkil edir.

Bakı metropolitenindən sonra sankt-peterburqlular da çoxfunksiyalı diaqnostika kompleksini istismara veriblər. Ə.Osmanov bu kompleksin funksional cəhətdən və təchizat baxımından Bakı metropolitenində istifadə olunandan xeyli geri qaldığını deyir: “Bizim kompleks funksional imkanları baxımından Sankt-Peterburqdakı analoqundan ən azı 2 dəfə öndədir”.

Müşavirə iştirakçılarına təkər cütlərinin vaqonun altından çıxarılmadan yonulması, qatarların park yollarında döndərilməsi üçün istifadə edilən qurğu, yeni stansiyalarda quraşdırılan platforma qapıları da (PSD) nümayiş etdirilib. “Bakı Metropoliteni” QSC-nin baş mühəndisi Sankt-Peterburqda təqdim olunan yeniliklər sırasında maşinistə nəzarət qurğusunu xüsusi qeyd edir: “Onu, şərti olaraq, maşinistin köməkçisi adlandırmaq olar. Bu qurğu qatarı idarə edən maşinistin səhhəti, psixoloji durumu barədə informasiyanı qatar dispetçerinə ötürür. Bu, təhlükəsizlik baxımından maraqlı yenilikdir”.

Ümumiyyətlə, Ə.Osmanov Sankt-Peterburq, eləcə də MDB məkanına daxil olan şəhərlərin yeraltı nəqliyyat müəssisələrində mühəndis fikrinin səviyyəsinə görə Bakı metropoliteninin çoxlarından üstün olduğunun oktyabrın əvvəlində “Metro” Beynəlxalq Assosiasiyası üzvlərinin işarəvermə və rabitə mütəxəssislərinin Bakı müşavirəsində bir daha öz təsdiqini tapdığını vurğulayıb. Peterburq müşavirəsi zamanı Bakı metropoliteni rəhbərliyinin həm təşkilatçılıq, həm də bu müşavirələrə, təcrübə mübadiləsinə verdiyi önəm, ən əsası, innovasiyaların tətbiqi baxımından əks-səda doğuran layihələri dəfələrlə xatırlanıb.

“Sankt-Peterburq toplantısı bir daha göstərdi ki, Bakıda metronun inkişafı, ən müasir texnoloji yeniliklərlə təmin olunması sahəsində götürülən istiqamət düzgün seçilib və bu yol uğurla davam etdirilir”, - deyə Ə.Osmanov vurğulayıb. Onun qənaətinə görə yeni – Bənövşəyi xətlə yanaşı, Yaşıl və Qırmızı xətlərdə də yeniləşmə tədbirlərinin davamlı aparılması yaxın illərdə Bakı metrosunun simasını, təhlükəsizlik standartlarını, xidmət səviyyəsini daha üstün səviyyəyə çıxaracaq.
Bu xəbər oxucular tərəfindən 194 dəfə izlənilmişdir!
Google Yahoo Facebook Twitter
Del.icio.us Digg StumbleUpon FriendFeed