Şrift:
Azərbaycanlı fəal Kazım Səfabəxşın məhkəmə iclası keçirilib
26.02.2019 [11:28] - Güney Azərbaycan xəbərləri, Güney Azərbaycan-Təbriz
Tehranın Evin zindanında saxlanılan azərbaycanlı milli-mədəni fəal Kazım Səfabəxşın (Koroğlu) mühakimə olunduğu bildirilir.

Məhkəmə iclası fevralın 24-də Tehran İnqilab Məhkəməsinin 28-ci şöbəsində keçirilib.

Məlumata görə, məhkəmə prosesində fəalın “sistemin əleyhinə təbliğat aparmaq” və “milli təhlükəsizliyi pozmaq məqsədi ilə sözləşmə və toplaşma” ittihamları ilə üzləşdiyi məlum olub.

Fəalın saxlanmasından 3 ay keçməsinə baxmayaraq onun barəsində vəsiqə qərarı çıxarılmayıb.

“Tehran Traxturçuları”nın lideri kimi tanınan Kazım Koroğlu 2018-ci il noyabrın 21-də Təbrizin “Traxtur” futbol komandası ilə “Perspolis”in Tehranda keçirilən görüşü ərəfəsində axşam saatlarında saxlanılıb, o hazırda Evin zindanının 4-cü korpusunda saxlanılır.

Bundan əvvəl azərbaycanlı fəallar Kazım Koroğlunun azadlığa buraxılması tələbi ilə Tehranda bildirişlər yayıb və “Traxtur” görüşlərində plakatlar nümayiş etdiriblər.

Kazım Koroğlu Güney Azərbaycanın Meşginşəhr (Xiyav) şəhərindəndir, lakin son vaxtlar Tehranda işləyir. O “Traxtur” komandasının Tehranda keçirdiyi görüşlərdə komanda tərəfdarları arasında xüsusi rol oynayır. Fəal bundan əvvəl də mədəni fəaliyyətlərinə görə təhlükəsizlik qüvvələri tərəfindən saxlanılıb və müxtəlif təzyiqlərə məruz qalıb.

N.S
Bu xəbər oxucular tərəfindən 91 dəfə izlənilmişdir!
Google Yahoo Facebook Twitter
Del.icio.us Digg StumbleUpon FriendFeed