Şrift:
Dövlət Sosial Müdafiə Fondunun Gədəbəy rayon şöbəsində aparılmış auditin nəticələri açıqlanıb
30.03.2019 [11:11] - Gündəm, İqtisadiyyat
Hesablama Palatasının kollegiya iclasında 2017-ci il yanvarın 1-dən 2018-ci il oktyabrın 1-dək olan dövrdə Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun Gədəbəy rayon şöbəsi üzrə gəlir və xərclərin, həmçinin şöbənin saxlanılması xərclərinin icrasına dair auditin nəticələri müzakirə edilib.

Palatanın mətbuat xidmətindən bildirilib ki, müzakirə zamanı auditi həyata keçirmiş qrupun məlumatı dinlənilib və fəaliyyət istiqaməti üzrə müvafiq auditorun hesabatı təsdiqlənib.

Təqdim edilmiş məlumatlara əsasən, Gədəbəy rayonu üzrə məcburi dövlət sosial sığorta haqları üzrə proqnozların tərtibində əsaslı yanaşma tətbiq edilməyib, təsdiq olunmuş proqnozlar aşağı səviyyədə icra olunub.

Pensiya təyinatının aparılması və ödənilməsi üzrə bir sıra hallarda ailə başçısını itirməyə görə əmək pensiyası təyinatı aparılarkən əmək qabiliyyətsiz ailə üzvlərinə pensiya təyin olunub-olunmaması, qulluq göstərilmə ilə əlaqədar staj müəyyən olunarkən qulluq göstərilənin qulluğa ehtiyacının olub-olmaması, faktiki qulluq göstərilməsi halları, eləcə də güzəştli iş stajı tam dəqiqləşdirilmədən və bir sıra zəruri sənədlər olmadan, həmçinin mülkiyyətində kənd təsərrüfatına yararlı torpaq sahəsi olan şəxslərin həmin torpaq sahəsinə görə qanunvericiliklə müəyyən olunmuş qaydada məcburi dövlət sosial sığorta haqları ödənilmədən pensiya təyinatı aparılıb, bir sıra hallarda dövlət qulluqçularının pensiya hesablanması üçün dövlət məvacibi düzgün hesablanmayıb.

Bundan əlavə, vəfat etmiş şəxslər barədə məlumatlar tam əldə edilməmiş, bir sıra hallarda vəfat etmiş pensiyaçılara vəfat tarixindən sonra da pensiya ödənişləri həyata keçirilərək artıq ödənişlərə yol verilib, eyni uşağa görə hər iki valideynin pensiyasının üzərinə, habelə sosial müavinət alan uşağa görə də əlavələr hesablanıb, yaşa görə pensiyaya keçməsinə baxmayaraq, əlilliyə görə əvvəlki pensiya ödənişi bir müddət davam etdirilib.

Vahid Elektron Müraciət və Təyinat Alt Sistemi (VEMTAS) vasitəsilə təyin edilmiş ünvanlı dövlət sosial yardımı işləri üzrə ailələrin maddi-məişət şəraitinin qiymətləndirilməsi məqsədilə auditin gedişində rayonun yerli icra hakimiyyəti orqanlarının nümayəndələrinin iştirakı ilə seçmə qaydada monitorinqlər təşkil edilib, nəticədə ailə tərkibi haqqında düzgün məlumat verilməməsi, pay torpağından, yardımçı təsərrüfatdan gəlirlərin nəzərə alınmaması, ailənin istifadəsində avtomobilin olmasının VEMTAS tərəfindən aşkar edilməməsi, ailənin ərizə-bəyannamədə göstərilən ünvanda yaşamaması və ya göstərilən ünvanların mövcud olmadığı, eləcə də qeyd edilən ünvanda digər ailənin yaşaması kimi nöqsanlara rast gəlinib.

Hesablama Palatasının kollegiyası Dövlət Sosial Müdafiə Fondunun Gədəbəy rayon şöbəsi tərəfindən yol verilmiş nöqsanların qısa müddət ərzində aradan qaldırılması, həmçinin nöqsanlara yol vermiş vəzifəli şəxslərin Azərbaycan Respublikasının qanunvericiliyi ilə nəzərdə tutulmuş qaydada məsuliyyətə cəlb edilməsi barədə qərar qəbul edib, icra olunması və həyata keçirilmiş tədbirlər barədə Hesablama Palatasına məlumat verilməsi məqsədilə Əmək və Əhalinin Sosial Müdafiəsi Nazirliyinə və Dövlət Sosial Müdafiə Fondunun Gədəbəy rayon şöbəsinə kollegiya qərarının surəti göndərilib.

Auditin nəticələri ilə bağlı Milli Məclisə məlumat verilib.
Bu xəbər oxucular tərəfindən 64 dəfə izlənilmişdir!
Google Yahoo Facebook Twitter
Del.icio.us Digg StumbleUpon FriendFeed