Şrift:
"Worldfood Moscow 2019" sərgisində Azərbaycan şirkətləri ixraca dair yeni müqavilələr bağlayıblar
01.10.2019 [10:26] - İqtisadiyyat
Rusiyanın Moskva şəhərində təşkil olunan “Worldfood Moscow 2019” beynəlxalq ərzaq sərgisi çərçivəsində Azərbaycanlı sahibkarlar xarici həmkarları ilə görüşlər keçirib, ixraca dair razılıqlar əldə edib, müqavilələr bağlayıblar.

Azərbaycanın “Karaca Fındıq” şirkəti Belarusdan olan şirkətlə 1 mln. ABŞ dolları dəyərində fındıq məhsulunun ixrac olunmasına dair müqavilə imzalayıb. Bundan başqa, “Karaca Fındıq” Rusiyaya 23 ton, Moldovaya 20 ton, Belarusa isə 13 ton qovurulmuş fındığın ixracına dair razılıq əldə edib.

Bundan başqa, “Azərstar” şirkəti Rusiyadan olan 2 şirkətlə 132 ton və 110 ton fındıq məhsulunun ixracına, “Grow Group Azerbaijan” şirkəti isə Rusiyanın iri mağazalar şəbəkəsi ilə 1 000 ton pomidorun ixracına dair müqavilə imzalayıb.

“Azhazelnut” şirkəti Rusiyanın müxtəlif şirkətləri ilə ümumilikdə 20 ton fındıq məhsulunun ixracına dair müqavilə bağlayıb. Qeyd edək ki, bu şirkətin məhsulları “WorldFood Moscow 2019” beynəlxalq ərzaq sərgisi çərçivəsində təşkil olunmuş “İlin məhsulu” müsabiqəsində qalib gəlib və mükafata layiq görülüb.

Sərgi çərçivəsində həmçinin, Azərbaycanın “Az-Granata”, “TAC”, “Madena”, “Şirin Aqro”, “Göygöl Şərab”, “Amoris”, “Agro-Azərinvest”, “Abşeron Şərab”, “Crispa Snacks”, “AHEC”, “Balxurma”, “Şərq Ulduzu”, “Merit Brand” və “AZNAR” şirkətləri istehsal etdikləri məhsulların ixracına dair Rusiya, Körfəz ölkələri, Hindistan, Qazaxıstan, Latviya, Almaniya, Çin və digər ölkələrdən olan şirkətlərlə danışıqlar aparıb və ilkin razılıq əldə ediblər.

Xatırladaq ki, “Worldfood Moscow 2019” beynəlxalq ərzaq sərgisində qida, şərab və spirtli içki məhsulları sahəsində fəaliyyət göstərən 33 Azərbaycan şirkəti öz məhsullarını “Made in Azerbaijan” vahid ölkə stendində nümayiş etdirib.
Bu xəbər oxucular tərəfindən 43 dəfə izlənilmişdir!
Google Yahoo Facebook Twitter
Del.icio.us Digg StumbleUpon FriendFeed