Şrift:
“Microsoft” Android sistemi ilə işləyən qatlanan telefonunu təqdim edib
03.10.2019 [14:17] - Gündəm, Sosial
Amerikanın “Microsoft” korporasiyası oktyabrın 2-də Nyu-York şəhərində planşet kimi də istifadə oluna bilən qatlanan “Surface Duo” smartfonunu təqdim edib.

Kompaniyanın rəsmi saytı xəbər verir ki, smartfon Android əməliyyat sistemi üçün nəzərdə tutulub. O, hər biri 5,6 düymlük iki ekrana malikdir. Qurğudan açıq şəkildə 8,3 düym ekranlı planşet, qatlanmış vəziyyətdə isə smartfon kimi istifadə etmək olar.

Hər iki ekran eyni zamanda müxtəlif proqramların işini əks etdirə bilir. Bundan başqa, ekranlardan birindən virtual klaviatura və ya coystik kimi də istifadə etmək mümkündür. “Surface Duo” smartfonunun hazırlanmasında “Microsoft” korporasiyasının tərəfdaşı qismində “Google” kompaniyası çıxış edib.

Korporasiya nümayəndələrinin məlumatına görə, qurğu 2020-ci ildə satışa çıxarılacaq.

Əsası 1975-ci ildə Bill Qeyts və Pol Allen tərəfindən qoyulan “Microsoft” personal kompüterlərdən tutmuş, mobil telefonlaradək müxtəlif qurğular üçün proqram təminatı istehsalı üzrə dünyanın ən iri korporasiyalarından biridir. Kompaniyanın mənzil-qərargahı ABŞ-ın Vaşinqton ştatının Redmond şəhərində yerləşir.
Bu xəbər oxucular tərəfindən 53 dəfə izlənilmişdir!
Google Yahoo Facebook Twitter
Del.icio.us Digg StumbleUpon FriendFeed