Şrift:
Ermənistan Bakıda keçiriləcək MDB ölkələri DİN rəhbərləri Şurasının iclasında iştirakdan imtina edir
03.09.2012 [15:08] - Xəbərlər, Hadisə
Ermənistan Polisi Bakıda keçiriləcək MDB ölkələrinin Daxili İşlər Nazirləri Şurasının iclasının iştirakçılarına Azərbaycan zabiti Ramil Səfərovun Macarıstandan ekstradisiya olunması və sonradan əfv edilməsi ilə bağlı etiraz məzmunlu məktub göndərib. Məktubda Ermənistanın görüşdə iştirakdan imtina etdiyi bəyan edilir. Bu barədə bazar ertəsi RİA Novosti məlumat verir.
Qurumun mətbuat xidmətinin məlumatına görə, Ermənistan Polisinin rəisi öz səlahiyyətlərini MDB ölkələri DİN rəhbərləri Şurasının sədri olan Rusiyanın daxili işlər nazirinə verir.
Sənəddə deyilir ki, mövcud şəraitdə Ermənistan nümayəndə heyəti Bakıda Şuranın iclasında iştirakını mümkün hesab etmir.
Qeyd edək ki, Macarıstanda həbsdə olan Azərbaycan Ordusunun zabiti Ramil Səfərov cümə günü Azərbaycana gətirilib. O, ölkə başçısının sərəncamı ilə əfv olunub.
Ramil Səfərov 2004-cü ilin yanvar ayında Müdafiə Nazirliyinin sərəncamı ilə NATO proqramları çərçivəsində Macarıstanın Budapeşt şəhərində keçirilən 3 aylıq ingilis dili kurslarına ezam olunmuşdu.
Vətənə dönməyə 20 gün qalmış - fevral ayının 19-da kurslarda iştirak edən Qurqen Markaryan adlı erməni zabitini qətlə yetirmişdi. Elə həmin tarixdə Budapeştin hüquq-mühafizə orqanları tərəfindən həbs olunmuşdu. Budapeşt Şəhər Məhkəməsinin 13 aprel 2006-cı il tarixli hökmü ilə ömürlük azadlıqdan məhrum edilmişdi.
Daha əvvəl Azərbaycan Prezidenti Administrasiyasının Hüquq mühafizə orqanları ilə iş şöbəsinin müdiri Fuad Ələsgərov KİV-lərə bildirib ki, Ramil Səfərov, "Məhkum olunmuş şəxslərin verilməsi haqqında" Avropa Konvensiyası nəzərə alınaraq, Azərbaycan Konstitusiyası və qanunvericiliyi əsasında əfv edilib. "Konvensiyaya əsasən, hər bir tərəf əfv, amnistiya elan edə və ya ölkə Konstitusiyası, yaxud digər hüquqi aktlar əsasında məhkumun cəzasını azalda bilər", - Fuad Ələsgərov vurğulayıb.
Bu xəbər oxucular tərəfindən 770 dəfə izlənilmişdir!
Google Yahoo Facebook Twitter
Del.icio.us Digg StumbleUpon FriendFeed