Şrift:
“Benim Kongazım” iilik yapan Fondundan uşaklara saygı hem adetlerimizä eni kuvet
12.02.2020 [11:57] - Türk dünyası-Turan
Kongazdan üzdän zeedä uşaa deyni “BENİM KONGAZIM” iilik yapan Fondu büük bir yortulu sıra yaptı, nereyi buyur edildi küüyün herbir şkolasından hem üüredicilik kuruluşlarından 12 yaşınadan uşaklar. Uşakları, nicä büük insannarı, oturttular tatlılarlan hem meeva suyunnan donaklı masaların dolayına, zerä bu yortu – onnarın yortusuydu. Hepsi erleştiynän uşakların hem onnarlan bilä gelän ana-bobaların önündä kutlama sözleri tuttular “BENİM KONGAZIM” iilik yapan Fondun kurucuları hem azaları Mihail Karaseni, Anna Statova, İosif Karaseni, Andrey Palik hem başkaları. Bundan sora şennik başladı. Şennik zamanında uşaklara deyni konțert hem şaka oyunnar oldu, “Kolada” çalındı, “Hêy-hêy!” okundu, “Surva” adetleri gösterildi. Bütün bu şennik zamanı uşaklar erindä oturmadılar, onnar kalkıp oynardılar, viktorinalara cuvap verärdilär, istedii gibi şımarardılar. İki buçuk saat sürtän yortulu sıranın sonunda sıraya katılan üzdän zeedä uşaa verildi baaşış – tatlıylan dolu kutucuklar.
Bitkidä yortuda pay alannar hem yortuyu hazırlayannar ortak bir patret yaptılar “BENİM KONGAZIM” iilik yapan Fondun emblemasının hem onun Kongaz küüyün insannarına izmet için alınan mikroavtorbusun yanında. Lääzım urgulamaa, ani Kongazda hiç bir zaman kesilmeer gagauzların evelki adetleri, yıldan yıla onnar bakılêr hem “BENİM KONGAZIM” iilik yapan Fondunnan bu adetlerä bu yıl eni kuvet verildi. Not. “BENİM KONGAZIM” iilik yapan Fondu kuruldu 2019-cu yılda kongazlılar Mihail, İosif hem Demyan KARASENİ kardaşların hem Anna STATOVAnın çalışmalarınnan hem onnarın yanında bulunan insannarın zaametinnän.

DAVAM.AZ
“Komrat Bürosu” (Qaqouz Yeri)
Bu xəbər oxucular tərəfindən 125 dəfə izlənilmişdir!
Google Yahoo Facebook Twitter
Del.icio.us Digg StumbleUpon FriendFeed