Türkiyədə yeni növ koronavirus (COVID-19) infeksiyasına gündəlik yoluxma və ölüm halı kəskin şəkildə azalıb. Mayın 3-də ölkə üzrə 24 min bir nəfər üzərində test aparılıb. Onlardan 1670 nəfər xəstə çıxıb.

Bu barədə son rəqəmləri nazir Fahrettin Koca sosial şəbəkədə paylaşıb. Bildirilir ki, gün ərzində 4 min 892 nəfər sağalıb, 61 nəfər dünyasını dəyişib. Bununla da, ölkə üzrə sağalananların sayı 63 min 151 nəfərə çatıb. Bu vaxtadək 1 milyon 135 min 367 nəfər testdən keçirilib. Ümumilikdə 126 min 45 nəfər müalicəyə cəlb olunub. Hazırda 1424 nəfər reanimasiyada, 766 xəstə süni nəfəs aparatına qoşulmuş haldadır.

Qeyd edək ki, mayın 1-də yerli vaxtla saat 00.00-da Türkiyədə növbəti dəfə ölkənin 31 vilayəti üzrə komendant saatı tətbiq olunub. Bu məhdudiyyət mayın 4-də saat 00.00-da başa çatır. Ankara, İstanbul və İzmir daxil olmaqla ölkənin 31 vilayətinə giriş-çıxış qadağası isə eyni tarixdə saat 24.00-dək davam edəcək. Prezident Rəcəb Tayyib Ərdoğanın sədrliyi ilə Türkiyə Nazirlər Kabineti sabah videokonfrans formatında olacaq toplantıda yeni növ koronavirus (COVID-19) infeksiyasına qarşı mübarizə ilə bağlı ölkədəki vəziyyət və mövcud qadağaların aradan qaldırılması yollarını müzakirə edəcək. Bu barədə hökumətin qərarı toplantıdan sonra elan olunacaq.

Rəsmi dairələrdən, o cümlədən Səhiyyə Nazirliyi tərəfindən əhaliyə xəbərdarlıq olunur ki, koronovirus riskinin azalmasına arxayınlaşmaq olmaz. Virusun yayılmasına qarşı mübarizə qaydalarına, xüsusilə də sosial izolyasiya və təmizlik tələblərinə əməl olunmalıdır.