İtaliyanın aparıcı tədqiqat qurumlarından biri olan Beynəlxalq Münasibətlər İnstitutu (BMİ) Romanın Qrand Otel Plaza mehmanxanasının konfrans zalında cümə axşamı "Azərbaycanda qadınların rolu" adlı seminar keçirilib.
Azərbaycanın İtaliyadakı səfirliyindən verilən məlumata görə, tədbiri BMİ-nin direktor müavini Natali Toççi açıb.
Daha sonra BMİ-nin tədqiqatçısı Nona Mikelidze, AR Ailə, Qadın və Uşaq Problemləri üzrə Dövlət Komitəsinin xarici əlaqələr və protokol xidməti şöbəsinin müdiri Səbinə Manafova, London Universitetinin Şərq və Afrika Tədqiqatları Fakültəsinin elmi işçisi Farideh Heyat və İnsan Hüquqları üzrə İtaliya Helsinki Komitəsinin baş katibi Antonio Stanqo çıxış ediblər.
Tədbir zamanı qadınların Azərbaycan tarixində rolu, ölkəmizin müstəqillik əldə etdiyi illər ərzində qadınların hüquqlarının qorunması sahəsində aparılmış islahatlar, Ermənistan-Azərbaycan Dağlıq Qarabağ münaqişəsi nəticəsində məcburi köçkün və qaçqın düşmüş qadınların hüquqlarının bərpası və qorunması, ailə və qadın məsələləri sahəsində əldə olunmuş nailiyyətlər, mövcud problemlər barədə məlumat verilmiş və onların aradan qaldırılması imkanları ilə bağlı fikir mübadiləsi aparılıb.
Tədbir zamanı auditoriyanın çoxsaylı sualları cavablandırılmış və mövzu ilə əlaqədar geniş müzakirələr aparılıb.
Tədbirdə İtaliyanın akademik, dövlət və işgüzar dairələrin, mətbuat orqanlarının və Romadakı diplomatik korpusun nümayəndələri iştirak etmişdir.