davam.az - BÜTÖV AZƏRBAYCAN ADINA! > Çap səhifəsi

ATƏT-in Ukraynanın şərqində monitorinq missiyasında istifadə etdiyi dron vurulub.

Almaniya və Fransa tərəfi iddia edib ki, dron böyük bir ehtimalla rusiyayönlü separatçılar tərəfindən vurulub. Paris və Berlin cavabdehlərdən “hesab sorulmasını” tələb ediblər.
Noyabrın 1-də verilmiş birgə bəyanatda Almaniya və Fransa bildirir ki, bu dron Ukrayna ərazisinə Kiyevin nəzarətindən çıxmış şərq sərhədindən, yəni Rusiyadan daxil olan maşın karvanlarını izləyirdi. Bu da bildirilir ki, dron separatçıların nəzarətində olan ərazidə yer-göy raketini qeydə almışdı.
Ukrayna hökumət qoşunları ilə ölkənin şərqindəki moskvayönlü separatçılar arasında hərbi əməliyyatlar 2014-cü ilin aprelindən başlanıb. O vaxtdan bəri bu münaqişədə 10 mindən çox insan həlak olub.
Moskva və Kiyevlə birlikdə Ukrayna münaqişəsinin çözümü ilə məşğul olan Normand dördlüyünə daxil Fransa və Almaniya bildirir ki, ATƏT missisyasının ixtiyarında olan dron oktyabrın 27-də yoxa çıxıb.
Bu insident zamanı uzaqmənzilli dron Rusiya-Ukrayna sərhədini keçmiş maşın karvanını Nijnokrınsk şəhəri yaxınlığında izləyirdi. Bu şəhər qiyamçıların nəzarətindədir.
Berlin və Paris bildirir ki, drondan alınmış son məlumatlar onun vurulmasına görə məsuliyyəti Rusiya və onun dəstəklədiyi separatçıların daşıdığını göstərir.
Bəyanatda deyilir ki, “bu son dərəcə xoşagəlməz” insident ATƏT-in mandatını kobudcasına pozub.
ATƏT-in bu bölgədəki müşahidə missiyası mülki xarakter daşıyır.
Ötən mart ayında missiya 18 aylıq fasilədən sonra müşahidə dronundan istifadəni bərpa edəcəyini bildirmişdi. Dronların uçuşu onların dəfələrlə vurulub salınmasına görə dayandırılmışdı.

Ukraynada ATƏT-in dronu vuruldu