Deprecated: preg_replace(): The /e modifier is deprecated, use preg_replace_callback instead in /home/davam/public_html/engine/modules/show.full.php on line 292 davam.az - BÜTÖV AZƏRBAYCAN ADINA! > Çap səhifəsi > Aclıq aksiyasının 12-ci günündə olan Siyamək Mirzayinin son vəziyyəti barədə heç bir məlumat yoxdur
davam.az - BÜTÖV AZƏRBAYCAN ADINA! > Güney Azərbaycan xəbərləri, Güney Azərbaycan-Təbriz > Aclıq aksiyasının 12-ci günündə olan Siyamək Mirzayinin son vəziyyəti barədə heç bir məlumat yoxdur

Aclıq aksiyasının 12-ci günündə olan Siyamək Mirzayinin son vəziyyəti barədə heç bir məlumat yoxdur


Güney azərbaycanlı milli-mədəni fəal Siyamək Mirzayi barəsində nigaranlıq artır.

Fəal Tehranın Evin zindanın təknəfərlik kamerasında aclıq aksiyasının 12-ci gününü keçirdiyi bir vaxtda zindan və məhkəmə məsulları onun vəziyyəti barədə yaxınlarına heç bir məlumat vermir. Onun ailə üzvləri ilə görüşməsi və ya telefon əlaqəsi saxlamasına da qadağa qoyulub.

Siyamək Mirzayi aclıq aksiyasına başladığı gündən ona həbsxanada təzyiqlər artıb. O sonuncu dəfə iyulun 5-də ailəsi ilə qısa telefon əlaqəsi saxlayıb. Fəalın ailəsi və yaxınları onun vəziyyətindən nigarandır.

Güney azərbaycanlı fəal 3 illik həbs müddətini Tehranın Evin zindanında başa vurmasına baxmayaraq azadlığa buraxılmır, o Ettelaat Nazirliyinin nəzarətində olan zindanının 209-cu korpusuna intiqal edilib.

Fəal təhlükəsizlik orqanları və məhkəmə məsullarının qanunsuz qərarına etiraz olaraq iyulun 1-dən aclıq aksiyası keçirir.

Siyamək Mirzayi 2016-cı il iyunun 24-də Ərdəbilə yaxın Parsabad şəhərində saxlanılıb. O, əvvəlcə yerli ETTELAAT İdarəsinə, sonradan isə Tehranın Evin zindanına intiqal edilib. Azərbaycanlı fəal öncə Tehran məhkəməsi tərəfindən ölkənin milli təhlükəsizliyinə qarşı çıxmaq və qanunsuz qrup yaratmaq kimi qondarma ittihamlarla 10 il həbs və 2 il Təbəs şəhərinə sürgünə məhkum edilib, lakin sonralar Apellyasiya məhkəməsi fəalın işinə yenidən baxaraq onu 3 il həbs və 1 il Təbəs şəhərinə sürgünə məhkum edib.

Siyamək Mirzayi iyunun 26-da, məhkumluq müddətinin başa çatmasına 2 gün qalmış “sistemin əleyhinə təbliğat aparmaq” ittihamı ilə mühakimə edilib. Bundan sonra onun azadlığa buraxılması üçün 30 milyon tümənlik mülki vəsiqə qərarı təyin olunub. Lakin məhkəmə məsulları təyin olunan vəsiqəni qəbul etməkdən imtina edir və bu şəkildə fəalın azadlığa buraxılmasına maneçilik yaradırlar.

Məhkəmə azərbaycanlı fəala qarşı irəli sürdüyü “sistemin əleyhinə təbliğat aparma” ittihamının “sübutlar”ı kimi, onun həbsxanada Abbas Lisani və digər fəallarla telefon əlaqəsi saxlaması və aclıq aksiyası keçirməsini göstərib.

Fəal irəli sürülən ittihamı saxta və əsassız adlandırıb və bildirib ki, bu, təhlükəsizlik qüvvələri tərəfindən ona təzyiq göstərilməsi və azadlığa çıxmasının qarşısının alınması üçün təşkil edilən yeni oyundur.

Xatırladaq ki, güney Azərbaycanlı fəallar ötən günlərdə Azərbaycan şəhərləri və Tehranın müxtəlif məhəllələrində divarlara posterlər yapışdıraraq tanınmış fəal Siyamək Mirzayinin azadlığa buraxılmasını tələb ediblər, onun sərbəst buraxılmamasına qarşı etirazlar davam edir.
Azərbaycanlı şair və yazıçı Siyamək Mirzayi bundan əvvəl də Azərbaycan türk millətinin milli və demokratik hüquqları uğrunda apardığı mədəni mübarizəyə görə dəfələrlə təhlükəsizlik qüvvələri tərəfindən saxlanılıb, həbs cəzasına məhkum edilib və müxtəlif təzyiqlərə məruz qalıb. Fəal ali təhsilin yüksək lisans səviyyəsinə qəbul imtahanını müvəffəqiyyətlə keçməsinə baxmayaraq universitetə buraxılmayıb, onun təhsilinin davamına qadağa qoyulub.

N.S

Geri dön