davam.az - BÜTÖV AZƏRBAYCAN ADINA! > Gündəm, Mədəniyyət > Xalça Muzeyində “Gənc tamaşaçılar üçün muzey” adlı beynəlxalq konfrans keçiriləcək
Xalça Muzeyində “Gənc tamaşaçılar üçün muzey” adlı beynəlxalq konfrans keçiriləcək |
|
Oktyabrın 19-21-də Azərbaycan Milli Xalça Muzeyində (AMXM) “Gənc tamaşaçılar üçün muzey” adlı beynəlxalq konfrans keçiriləcək.
Muzeydən bildirilib ki, tədbir AMXM və Azərbaycan Mədəniyyət Nazirliyinin təşkilatçılığı, MDB ölkələrinin Dövlətlərarası Humanitar Əməkdaşlığı Fondunun dəstəyi ilə reallaşacaq. “Gənc tamaşaçılar üçün muzey” konfransı gənc ziyarətçi kontingenti olan muzeylər, həmçinin valideynlər və təhsil müəssisələri ilə muzeylər arasında münasibətlərin bütün nüanslarını əhatə etmək üçün nəzərdə tutulub. Sessiyalarda “Uşaqlar, yeniyetmələr və valideynlər üçün muzey proqramları”, “Uşaqlar və muzey: muzey mühitində dayanıqlı inkişafın perspektivləri”, “Uşaq auditoriyasının genişlənməsi və dinamikası: inklüziv layihələr”, “Muzeylər və məktəblər: muzey pedaqogikasının üfüqləri”, “Muzeylərdə uşaqlar üçün rəqəmsal materiallar” kimi mövzular müzakirə olunacaq. Tədbirdə Azərbaycan, Almaniya, Bolqarıstan, Çexiya, Hollandiya, Latviya, Qırğızıstan, Özbəkistan, Rusiya, Serbiya, Türkmənistan kimi ölkələrdən 24 muzey işçisi iştirak edəcək. Mövzunu nəzərə alaraq, bu konfransın ənənəvi elmi forumlarla müqayisədə daha sərbəst formatda keçirilməsi nəzərdə tutulub. Konfrans çərçivəsində akademik sessiyalarla yanaşı, sərgi, ustad dərsləri və zəngin mədəni proqram təşkil olunacaq və bu beynəlxalq tədbir parlaq, yaddaqalan hadisəyə çevriləcək. Geri dön |