Təbrizin “Traxtur” futbol komandası aprelin 27-də Xuzistanın “Fulad” takımı ilə qarşılaşıb.



Bu görüş “Traxtur”un İran üzrə futbol klublarının 17-ci super liqa yarışları çərçivəsində keçirdiyi son görüş olub. Əhvazın Təxti stadionunda baş tutan qarşılaşma 0:1 hesabı ilə “Traxtur”un xeyirinə yekunlaşıb.



Bu, “Traxtur”un son 80 gün ərzində əldə etdiyi birinci qələbədir.



Bu nəticədən sonra “Traxtur” 34 xala (imtiyaz) malik olub və 17-ci super liqa yarışlarını turnir cədvəlinin 10-cu pilləsində qərarlaşaraq başa vurub.



Azərbaycan klubu bu mövsümdə bir çox problemlərlə üzləşmişdir. Maliyyə sıxıntıları, İran Futbol Federasiyası İnzibati Komitəsinin kluba qarşı çıxardığı qərarlar, FiFA-nın “Traxtur”a qarşı oyunçu transferi qadağası və s. komandanın oyununa təsir edən amillərdir.