Şərqi Azərbaycan əyalətinin Tibbi Ekspertiza Mərkəzinin rəisi Əli Səfayifərdin verdiyi məlumata görə, cari ilin ilk 4 ayında (mart 21-iyul 21) baş verən yol qəzaları nəticəsində 271 nəfər dünyasını dəyişib.



Səfayifərd bildirib ki, bu rəqəm keçən ilin eyni müddəti ilə müqayisədə -hansı ki 322 nəfərdən ibarət idi- 16 faiz azalma göstərir. Onun sözlərinə görə, yol qəzalarında ölənlərin 231-sı kişi, 40-i isə qadın olub.



Səfayifərd qeyd edib ki, cari ilin ilk 4 ayında 181 nəfər şəhərlər arası, 63 nəfər şəhərdaxili və 10 nəfər Şərqi Azərbaycandan kənar yollarda baş verən qəzalarda dünyasını dəyişib.



“Qeyd olunan müddətdə Şərqi Azərbaycan yollarında baş verən yol qəzalarında 4 min 817 nəfər müxtəlif dərəcəli bədən xəsarətləri alıb, onlardan 3 min 666-ı kişi, 1151-i qadın olub,” deyə Səfayifərd əlavə edib.



Bu rəqəm keçən ilin eyni müddəti ilə müqayisədə -hansı ki 6 min 241 nəfərdən ibarət idi- 23 faiz azalma göstərir.



Səfayifərd əlavə edib ki, “tir ayında (iyun 21-iyul 21) Şərqi Azərbaycanda 77 nəfər yol qəzalarının qurbanı olub”.

Həmin müddətdə baş verən yol qəzalarında 1507 nəfər müxtəlif dərəcəli bədən xəsarətləri alıb.



Onun verdiyi məlumata görə, ötən il əyalətdə baş verən yol qəzalarında 882 nəfər həyatını itirib, 4 min 800 nəfər isə müxtəlif dərəcəli bədən xəsarətləri alıb.



Güney Azərbaycan yollarında təxminən hər gün çoxsaylı insan tələfatı və kütləvi xəsarət alma ilə nəticələnən müxtəlif yol qəzaları baş verir. Ekspertlər yolların qeyri-standart olması, avtomobillərin keyfiyyətsiz olması və insan amilini baş verən qəzaların əsas səbəbi kimi göstərir.