Küçük ayın (fevral) 26-da Gagauziyanın Başkannık binasında yapıldı bir toplantı, neredä incelendi Moldovanın üülen tarafınnan, Gagauziyanın hem Ukrayınanın taraflarınnan ilgili pek önemni bir problema – Yalpug deresinin ekologiya durumu.
Toplantında pay aldılar Moldova Parlamentın ekologiya hem regional ilerlemesi komisiyasının başı İnga Grigoriu hem komisiya azaları, Gagauziya İspolkomu Predsedatel yardımcısı Olesä Tanasoglu hem İspolkom azaları, Gagauziya Halk Topluşu Başı Vladimir Kıssa hem GHT deputatları, Komrat primarı Sergey Anastasov, Moldova ministerliklerin temsilcileri, cümne insannar hem jurnalistlär.
Son yıllarda Yalpug deresinin ekologiya durumu pek keskinneşti. Büünkü gündä Yalpuga binnärlän kubometra mındarlık atılêr, bu getirdi ona, ani Yalpugta en çok zihir – amiak zihiri var. Yalpug sularında püsürlük hem zihir konțentrațiyası 20 kerä taa zeedä nekadar var nicä olsun normalara görä. Bu uurda en aar durum Komratta. Komrattan sora, bütün ükünü urup Kongaz gölünä, bu durum var nicä katastrofaya dönsün. Bu da büük zararlar getirecek Yalpug kenarlarında bulunan Gagauziyanın Beşalma, Kongaz, Svetloe küülerinä, Moldovanın üülen tarafına hem Ukraynaya.
Yalpugun ekologiyasını annadarak, toplantıya katılannar urguladılar, ani yaz eşiindä bulunan Komrat kasabası Ekologiya katastrofasının kertiinä etişti. Bu da var nicä getirsin ona, ani burada yaz vakıdı ürek hastalıkları zeedelenecek hem var nicä sıtma da peydalansın.
Gagauziyanın cümne saalıı Merkezin başı İvan HASTA açıkladı, ani “epidemiologiya tarafından durum kritik kertiinä geldi. Bölä durum iki kerä artık olduydu. 90-cı yıllarda 26 kişidä holera hastalıı bulundu. 2000-ci yılların ortasında da dizenteriya hastalıın patlaması vardı. Büünkü gündä ürek sürmesi hastalıkların zeedelenmesi var”.
Epidemiyadan var nicä sadä Komrat kanalizațiya kolektorunun yapılması kurtarsın. Komrat primarı söledi, ani kolektor 80% hazır. Ama onu başarmaa deyni lääzım taa 30 milion ley. Bu para Komradın hem Gagauziyanın bücetindä yok. Burada Merkez kuvetlerin yardımı lääzım.
GHT Başı yardımcısı Aleksandr Tarnavskiy urguladı, ani 2010-cu yılda Komrat primariyası kazandıydı bir grand Moldova Ekologiya Fondunda, ama ozaman “paklamak sisteması için verdilär sade 1,5 milion ley, da sora dedilär, ani bücettä başka para yok”.
Parlament komisiyasının azası Vadim Ftesku dedi: “Bu problemaya bakışı keskinneştircez. Demää, ani yaarına para olacek, yok nicä deyelim. Ama biz lääzım soralım, neçin, herliim siz kazandıysanız proektı, para vermerlär”.
Parlament komisiyasının azaları, hepsini sesleyip hem spețialistlerä soruşlar sorup, adadılar konunun ayırıntılarını incelemää hem Moldova Respublikasının Merkez kuvetlerini bu keskin problemanın çözülmesinä üzünnän döndürmää.

DAVAM.AZ
“Komrat Bürosu” (Qaqouz Yeri)