Milliyyətçi Hərəkat Partiyasının Kahramanmaraş il başqan yardımçısı, iş adamı Mustafa Pakdamarla müsahibə

- Mustafa bəy, öncə sizi Azərbaycanda xoş gördük. Yəqin ki, bu, sizin Azərbayacana ilk səfərinizdir?

- Bəli, bu, Azərbaycana ilk səfərimdir. Nə zamandır ki, Azərbaycana gəlib, burada qardaşlarımızı görmək istəyirdim. Bundan sonra digər türk ölkələrinə də getməyi düşünürəm. Onu qeyd edim ki, Azərbaycan bizim öz doğma vətənimizdir. Burada özümüzü görürük. Buranı öz doğma vətənim kimi görürəm və elə bilirəm ki, öz vətənimə gəlmişəm. Heç bir zaman Azərbaycanı ayrı olaraq görmədik. Azərbaycanı çox sevirəm və Azərbaycanın güclənməsi, Türkiyənin, türk dünyasının güclənməsi deməkdir. Biz məsələyə bu prinsipdən yanaşırıq.

- Bu gün Türkiyədən Azərbaycana baxarkən onun siyasi-iqtisadi və sosial vəziyyəti necə görürsünüz?

- Son illər Azərbaycan çox dəyişib və inkişaf edir. Türkiyə hər zaman Azərbaycanı dəstəkləyib və bundan sonra da dəstəkləyəcək. Bildiyiniz kimi, Türkiyənin 2023-ci illik layihəsi var. Türkiyə gücləndikcə Azərbaycanında dünyada mövqeylərinin güclənməsinə böyük təsir edəcək. Ankara və Bakı gec-tez bölgənin parlayan ulduzları olacaqlar. Bunun qarşısını almaq mümkün deyil.

- Türkiyənin türk dünyası ilə bağlı siyasətini necə dəyərləndirirsiniz?

- Təbii ki, bu, bizi o qədər qane etmir. Ancaq birliyin yaranması istiqamətində işlər gedir və mücadilə aparılır. Bilirsiniz ki, bu birliyin yaranmasını əngəlləmək istəyən qüvvələr çoxdur. Bizə bir çox maneələr yaradırlar. Buna baxmayaraq, bir çox önəmli addımlar atıldı və qarşıda işlərin yaxşı gedəcəyinə əminəm.

- Nə üçün bu gün Türkiyənin üzərinə bu qədər təzyiqlər var?

- Türkiyə son illər çox inkişaf edib və bir çox sahələrdə nailiyyətləri var. Bu inkişafdan və güclənmədən narahat olan qüvvələr çoxdur. Ona görə Türkiyənin diqqətini başqa istiqamətə yönəltmək üçün bu tipli oyunlar qururlar. Atalarımızın yaxşı bir məsəli var: "Altı zəngin olan ölkənin üstü rahat olmaz". Deməli, ağıllı hərəkət etməliyik ki, bizi təxribatlara çəkə bilməsinlər.
- Bildiyiniz kimi, Azərbaycanın əsas problemi olan Dağlıq Qarabağ məsələsi neçə illərdir ki, həll olunmur...
- Onu da qeyd edim ki, Qarabağ məsələsi təkcə Azərbaycanın problemi yox, türk dünyasının problemidir. Biz bunu belə görürük. Türkiyə bundan sonra bu məsələdə Azərbaycanın yanında olub, bundan sonra da olacaq. Bu məsələdə heç kimin şübhəsi ola bilməz. Türkiyədə iqtidar-müxalifət partiyalarının Qarabağ məsələsində ortaq mövqeləri var. Bu mövqelər Azərbaycanın haqqı bərpa olunmayana qədər dəyişən deyil.

- Türkiyəyə dönəndən sonra iş adamlarınıza Azərbaycanla bağlı nə kimi bilgilər verməyi düşünürsünüz?

- Qayıdan kimi iş adamlarımıza Azərbaycanda müxtəlif sahələrə yatırım qoymaları üçün təbliğat aparacam. Son illər Azərbaycanda iqtisadi vəziyyət xeyli dəyişib. Azərbaycandan kifayyət qədər bilgilərlə gedirəm. Qeydlərimi götürmüşəm. Çünki iş adamlarımız Azərbaycana yatırım qoymalıdırlar və işdə də maraqlı olmalıdırlar. Nəin ki, Azərbaycana, digər türk dövlətlərinə də yatırımlar qoyulmalıdır.

- Tez-tez xarici ölkələrdə olursunuz. Bildiyimiz qədər diaspor işlərində də fəalsınız. Bu gün dünyada Azərbaycan və türk diasporu vahid şəkildə hərəkət edirlərmi?

- Dünyanın müxtəlif yerlərində oluram və bir çox keçirilən tədbirlədə də iştirak edirəm. Bu məsələdə məni qane etməyən tərəflər var. Düşünürəm ki, hər şeyin zamana ehtiyacı var. Bir-birimizə yaxın olmalıyıq və daha yaxın tanımalıyıq. Zaman keçdikcə birliyimiz daha güclənəcək. Biz bir olmağa məhkumuq. Başqa yolumuz yoxdur.

Elnur Eltürk