Şrift:
Qondarma rejim sakinlərdən pasportları yığıb ki, əhali Qarabağı tərk etməsin
04.08.2014 [11:44] - Gündəm, MDH
Cəbhədə döyüşlərin şiddətlənməsi və ölkədəki mövcud vəziyyətlə bağlı, Milli Dirçəliş Hərəkatı Partiyası xalqa ünvanlanmış müraciət yayıb. Bu müraciətdə MDHP, cəbhədə gərginliyin artmasıyla bağlı partiya mövqeyini bəyan etməklə bərabər, xalqı müşahidə olunan xarici təxribatlara uymamağa çağırıb. Media nümayəndələrinə təxribat xarakterli, hərbi sirr və dedi-qodudan ibarət olan xəbərlərin yayılmasının qarşısını almaq üçün diqqətli olmağa səsləyən MDHP, döyüşlər vaxtı şəhid olmuş döyüşçülərimizlə bağlı başsağlığını çatdırıb. Partiyanın müraciətdə diqqət edilməli məqamlarla yanaşı, maraqlı bir məlumat da öz əksini tapıb. Belə ki, müraciətdə bildirilir ki, əldə edilmiş məlumatlara görə, qondarma rejim sakinlərdən pasportları yığıb ki, əhali Qarabağı tərk etməsin.
MDHP-nin həmin bnəyanatının tam mətnini təqdim edirik:

Milli Dirçəliş Hərəkatı Partiyasının MÜRACİƏTİ

Son günlər cəbhədə erməni-rus birləşmələrinin aktivləşməsi nəticəsində, döyüşlər şiddətlənmiş və demək olar ki, dünya ictimaiətinin diqqətini özünə cəlb etmişdir. Heç şübhəsiz ki, Azərbaycan və Ermənistan prezidentlərinin görüşünün yaxınlaşdığı bir vaxtda cəbhədə gərginliyin artması tərəflərin marağına uyğun deyil. Lakin, Rusiyanın hazırda beynəlxalq münasibətlərdə düşdüyü çıxılmaz vəziyyətrdən dolayı, özünün yaratdığı münaqişə ocaqlarından istifadə etmək marağı və iyul ayının sonlarına doğru Ermənistanda yerləşdirilmiş 102-ci hərbi hissəsində dağ təlimlərinin keçirilməsi barədə yayılmış xəbərlər əslində maraqlı tərəfin aşkarlanmasının göstəriciləridir.
Hardan qaynaqlanmasından asılı olmayaraq, düşmən cəbhədə yaratdığı gərginliyinin layiqli cavabını alır. Azərbaycan ordusunun cavab zərbələri Ermənistanda çaşqınlıq yaradıb. Qarabağda çoxsaylı itgi verən düşmən tərəfi ölkədə etiraz dalğası yaranmasın deyə, Ermənistanla Qarabağ arasında olan mülki rabitəni kəsib və itgilərinin sayını əhalidən gizlətməyə çalışır. Hətda, əldə etdiyimiz məlumatlara görə, vəziyyət o həddə çatıb ki, qondarma rejim sakinlərdən pasportları yığılıb ki, əhali Qarabağı tərk etməsin. Eynı zamanda, Ermənistan hərbi müttəfiqi ilə birgə hərəkətə keçərək, Azərbaycana qarşı informasiya təziqindən istifadə edirlər.
Biz, Milli Dirçəliş Hərəkatı Partiyası olaraq, xalqı mərkəzləşmiş məlumat xidmətindən yararlanmağa və təxribat xarakterli şaiələrə uymamağa çağırırıq. KİV-ni isə, xəbər qaydalarına və xəbər mədəniyyətinə riayiət etmnəyə səsləyirik. Müdafiə Nazirliyinin yaydığı xəbərlərdən başqa, cəbhədən gələn şayiələrin bir hissəsi dedi-qodu, bir hissəsi isə isə düşmən agenturasının yaydığı yanlış informasiyadır. Ən azından, döyüş şəraitində birinin qəsdən, yaxid bilməməzlikdən ötürdüyü məlumatı dərc etməklə hərbi sirri yaymış ola bilərsiniz. Nəzərə alınmalıdır ki, bu hadisələr fonunda biz erməni mətbuatını necə izləyiriksə, düşmən də bizim mətbuatı elə diqqətdə saxlayır. Bu səbəbdən də media nümayəndələrimizi mətbuata çıxan hər bir xəbərin hansı fəsadlar yarada biləcəyinin məsuliyyətinin fərqinə varmağa çağırırıq.
Bunlardan əlavə, yaranmış gərgin vəziyyətdən kiçik siyasi maraqlar naminə yararlanmaq yolverilməzdir. Biz hakimiyyətin siyasi kursunu ən sərt şəkildə tənqid edən müxalifət partiyalarından biri olsaq da, bu gün üçün xalqa səslənirik ki, düşmən hücumları və yaratdığı təxribatlar hakimiyyətə qarşı deyil, dövlətimizə və xalqımıza qarşıdır. Toplum olaraq cəbhədəki gərginlikdən siyasi yararlar çıxarmağa çalışanlara qarşı olmaliyiq və bu cür halları təxribat kimi qiymətləndirməyi bacarmalıyıq.
Bu sınaqda bir dövlət və xalq kimi, birliyimiz müşahidə olunur ki, biz bu bu birliyi qorumağı bacarmalıyıq və təxribatlara uymamalıyıq. Bu gün cəbhədə gedən döyüşlər Azərbaycan ordusunun nəzarətindədir. Ordumuz düşmənin layiqli cavabını verir. . Ordumuzun düşmənə ağır zərbələr vurduğunu qarşı tərəf gizlətməyə çalişsa da artıq dünya mətbuatına bu bərədə xeyli xəbərlər sızmışdır.
Düşmənin diversiya qurupunun qəfil hücumunun qarşısını alarkən və sonrakı davam edən şiddətli atışmalarda Azərbaycan ordusu Şəhidlər verdi. Lakin Azərbaycan ordusu ermənilər kimi itgilərini morqlarda gizlətmir, onları Şəhid adına layiq şəkildə son mənzilə yola salır. Vətənimizin müdafiəsi uğrunda verdiyimiz Şəhidlər xalqımızı kədərə boğan qürurlarımızdırlar. Tanrının sevimli bəndələri imişlər ki, Tanrı onları Şəhidlik zirvəsinə ucaltdı. Milli Dirçəliş Hərəkatı Partiyası olaraq başımız sağ olsun deyirik və xalqımıza bu ağır sınaqlarda səbr diləyirik!

Milli Dirçəliş Hərəkatı Partiyası
04.08.2014
Bu xəbər oxucular tərəfindən 1112 dəfə izlənilmişdir!
Google Yahoo Facebook Twitter
Del.icio.us Digg StumbleUpon FriendFeed