Son zamanlar diqqətimi çəkən məqamlardan biri də xüsusi çalmalı gənclərin sayının artmasıdır. Belə gənclərə, xüsusilə qızlara müxtəlif yerlərdə şəhər gəzintisi zamanı rast gəlmək olur. Həmin çalma, PKK terror təşkilatı üzvlərinin həvəslə geyindiyi və onların simvolu sayılan xüsusi bir geyim formasıdır. Məsələni araşdırmaqda məqsədim heç də həmin geyimdən istifadə edən gəncləri hər hansı bir terror təşkilatına bağlılıqda suçlamaq deyil. Çünki araşdırmalarım onu göstərir ki, belə gənclərin əksəriyyəti onun mahiyyətini dərk etmədən, sadəcə bir dəb kimi qəbul edir və ondan istifadə edir. Ona görə də mənim üçün daha maraqlı olan məsələ, çalmanın yayımında, təbliğində iştirak edən və bunu həyata keçirən şəxslərin müəyyənləşməsidir. Çünki o şəxslər çalmaların PKK terror təşkilatının simvolu olduğunu çox gözəl bilir.
Məsələ ilə bağlı ilk diqqət çəkən məqamlardan biri televiziya ekranlarında və metrolarda durmadan yayımlanan “MİAD” düyülərinin reklam çarxıdır. Əgər diqqət yetirilsə çəkiliş zamanı düyülər simvolik olaraq xüsusi rəqs edir. Və bu zaman düyülərin baş hissəsində həmin çalmanı açıq-aydın görmək olur. Bəlkə də bu hal bir çoxlarına adi görünə bilər. Hətta reklamı sifariş edən və ya hazırlayan üçün də müəyyən məqsəd daşımaya bilər. Amma mən əminəm ki, məsələdə kiminsə xüsusi marağı olub. Bu, ya onu sifariş edən, ya da hazırlayan tərəfindən bilərəkdən həyata keçirilib. Məqsədim hələ ki, məsələni ictimailəşdirmək olduğundan şəxs adlarını açıqlamıram.
Mövzu ilə bağlı şəhər gəzintilərinin birində maraqlı bir hadisə ilə qarşılaşdım. Metronun İnşaatçılar stansiyası qarşısında ortaboylu bir şəxsin həmin çalmaları əl satışı ilə həyata keçirdiyini gördüm. Nümunə olaraq özü də həmin çalmadan istifadə edirdi. Sizə təqdim etdiyim şəkil həmin anda çəkilib. Şəxsə yaxınlaşıb çalma ilə maraqlandım, almaq istədiyimi bildirdim. Xüsusi geyimdə olduğumdan bəlkə də şübhələndi. Cavabında : “Bu xanımlar üçün” deyib üzünü çevirdi və hərəkət etməyə başladı. Kişinin bu hərəkəti artıq mənə bir çox şeyləri aydınlaşdırdı. Birincisi əgər pul qazanmaq məqsədilə çalmanı satırdısa, hansı cinsin onu alması əhəmiyyətli olmamalıydı. Həm də gündəlik satışdan əldə olunan gəlirin bəlkə də onun ancaq çörək pulunu təmin edəcəyini nəzərə alaraq. İkincisi kişinin danışıq üslubu idi. Həmin danışıq adi Azərbaycan türkünün danışıq üslubundan fərqlənirdi. Bu fərqlilik onun yalnız danışıq üslubunda deyil, həm də sifət quruluşunda aydın sezilirdi. Kişi avtobusa minib getdi. Mən isə bu düşüncələrlə yoluma davam etdim. Qərar verdim ki, bir yazı yazım. Heç olmasa ictimai maarifləndirməni gücləndirək. Həmin çalmadan istifadə edənləri hər kəs qınasın, onun mahiyyətini anlatsın. Ən azı müxtəlif Türkiyə filmləri vasitəsilə bunu hər kəs edə bilər. Həmin filmlərdə PKK “fədai”lərinə nəzər yetirməklə bunu görə bilərik.
Bir də onu düşündüm ki, niyə Bozqurdun əksini tapdığı çalma və ya baş örtükləri olmasın? Çünki biz Vətən üçün ölməyə hazırıq. Amma Vətən üçün yaşamaq, millət kimi yaşamaq çox çətindir. Vətən isə bizdən onu tələb edir. Hər kəs Vətən üçün nədənsə keçdiyini öz həyatında hiss etməlidir. 410 min kv km Azərbaycanın 18 faizinin Vətən olduğunu UNUTMA!!!

Seymur HƏSƏNLİ
MDHP Gənclər Təşkilatının sədri