Azərbaycan Avrasiyanın rəqəmsal mərkəzinə çevrilir.

Bunu "Qazprombank"ın Bazar konyunkturunun təhlili departamentinin rəis müavini Gulnara Haydarşina deyib.

"Milli İnternet provayderi AzerTelecom genişmiqyaslı “Azerbaijan Digital Hub” proqramını həyata keçirir. Proqram həmçinin Azərbaycanı rəqəmsal xidmətlərin idxalçısından dünya əhalisinin dörddə birini (Yaxın Şərq, Mərkəzi, Cənubi və Cənub-Şərqi Asiya) təşkil edən regionun ən böyük ixracatçısına çevirmək məqsədi daşıyır. Bu proqram Azərbaycanın Qazaxıstan və Türkmənistanla birgə həyata keçirdiyi daha böyük "Rəqəmsal İpək Yolu" layihəsi ilə birgə həyata keçirilir. "Rəqəmsal İpək Yolu" layihəsinin həyata keçirilməsi Mərkəzi Asiya, Çin və Avropa ölkələri arasında məlumat ötürülməsini sürətləndirəcək", -deyə o bildirib.

G.Haydarşina vurğulayıb ki, Azərbaycan dövlət proqramlarının köməyi ilə informasiya texnologiyaları sektorunun inkişafına böyük diqqət yetirir.

"Hökumətin dəstəyi ilə İT sektorunun inkişafı üçün üç istiqamət - maliyyə texnologiyalarının yaradılması, kibertəhlükəsizliyin təmin edilməsi (Azərbaycan Kibertəhlükəsizlik Təşkilatları Assosiasiyası 2022-ci ildə yaradılıb) və Azərbaycanda xarici proqramçıların və digər sənaye işçilərinin cəlb edilməsi ilə İT-autsorsinq sahəsinin inkişafı həyata keçirilir. Ehtimal olunur ki, Azərbaycan İT xidmətlərinin autsorsinqi üçün regional mərkəzə çevriləcək ki, bu da onun Avrasiya məkanında rolunu gücləndirməyə kömək edəcək", - deyə o əlavə edib.