Minlərlə diaspor üzvü Denfert Rochereau meydanında qondarma “erməni soyqırımı” ilə bağlı qanunun Senatda müzakirəyə çıxarılmasına etiraz edir


Qondarma “erməni soyqırımı”nın inkarına görə cinayət məsuliyyətini nəzərdə tutan qanun layihəsinin Fransa Senatında müzakirəyə çıxarılmasına etiraz edən Türkiyə və Azərbaycan diasporunun minlərlə üzvü 21 yanvar tarixində Parisdə aksiya keçirib. Türkiyənin NTV telekanalına istinadən verdiyi məlumata görə, aksiya saat 14:00-da başlayıb, 19:00-da başa çatıb.

Parisdə Denfert Rochereau meydanında keçirilən aksiyaya Fransanın müxtəlif bölgələrindən, Almaniya, Belçika, Hollandiya, İngiltərə və digər ölkələrdən gələn Türkiyə və Azərbaycan türkləri qatılıblar. Digər Avropa ölkələrində yaşayan Türkiyə və Azərbaycan türkləri qatar, təyyarə, o cümlədən 526 sərnişin avtobusu ilə Parisə axışıb. Denfert Rochereau meydanı aksiyaçılarla dolub. Aksiya iştirakçıları yanvarın 23-də Senatda müzakirəyə çıxarılacaq qondarma “erməni soyqırımı”nın inkarına görə cinayət məsuliyyətini nəzərdə tutan qanun layihəsinin ifadə və düşüncə azadlığına, o cümlədən Fransa Konstitusiyasına zidd olması ilə bağlı şüarlar səsləndirib, plakatlar qaldırıblar. Aksiyada layihənin pərdə arxasındakı əsas təşəbbüskarı sayılan Fransa prezidenti Nikola Sarkozinin də əleyhinə şüarlar səsləndirilib. Plakatlarda “Tarixi tarixçilərə buraxın, seçki üçün hazırlanmış qanuna yox!” şüarı yazılıb.