Mərkəzi qərargahı Nyu-Yorkda yerləşən Jurnalistlərin Hüquqlarını Müdafiə Komitəsi (JHMK) dünyada ən çox jurnalist hüquqlarının pozulduğu 5 ölkənin siyahısını açıqlayıb. İranın liderlik etdiyi siyahı 2011-ci ilə aid hesabatlar əsasında tərtib edilib. Təşkilatın hesabatında bildirilib ki, 2011-ci il dekabrın 1-dək olan məlumata əsasən, İranda 42 jurnalist həbsdə olub, 21 jurnalist təkadamlıq kamerada saxlanılıb, 18 jurnalist ölkəni tərk etmək məcburiyyətində qalıb. Ümumilikdə isə jurnalistlərə 6 aydan 19,5 il müddətinə qədər həbs cəzası verilib. Onlardan 12 nəfərin səhhətində problem var, 14 jurnalist isə ağır işgəncələrə məruz qalıb. Həbsdə olan 5 jurnalistə ailəsi ilə görüşməyə, 4 nəfərə isə tibbi yardım göstərilməsinə icazə verilmir. Jurnalistlərin Hüquqlarını Müdafiə Komitəsinin ötən ilin hesabatları əsasında hazırladığı siyahıda İrandan sonrakı yerləri isə uyğun olaraq Eritreya, Çin, Miyanma və Vyetnam tutur.